ҚР Президентінің кеңесшісі Мәлік Отарбаев Ұлытау облысына келіп, бірқатар кездесулер өткізді, деп хабарлайды etozhez.

 

Бірінші кездесу облыс имамдарымен өтті. Оған облыс аумағындағы мешіттердің бас имамдары қатысты. Кездесуде Мемлекет басшысының "Адал адам – Адал еңбек – Адал табыс" ұлттық құрылтайының үшінші отырысында дәстүрлі діни құндылықтар туралы жасаған баяндамасы талқыланды.

Мәлік Отарбаев облыс орталығында өңірдің шығармашылық зиялы қауым өкілдерімен, этномәдени бірлестіктердің басшыларымен, БАҚ басшыларымен, жастармен кездесті.

"Кездесу барысында ұлттық құрылтайдың үшінші отырысында көтерілген мәселелер жан-жақты талқыланып, қатысушылар қоғамдағы өзекті мәселелер бойынша пікір алмасты", - делінген хабарда.

 

Айта кетері, облысқа жұмыс сапары барысында Президент кеңесшісі "Жошы хан" тарихи-мәдени кешеніне, Алашахан мен Домбаул кесенелеріне, Ұлытау ауданындағы тарихи орындарға барды.

 

Естеріңізге сала кетейік, Отарбаев қызметіне 2022 жылдың 27 сәуірінде кірісті. Бұған дейін ол Қолжазбалар және сирек кітаптар ұлттық орталығының басшысы, сондай-ақ Түркістан облысы әкімінің орынбасары (2018-2020 жылдар) болып жұмыс істеген. Осыдан бір ай бұрын ол Қарағандыда осыған ұқсас кездесу өткізді.